Ari es Tmaziɣt niɣ ejj xaf-k Tamaziɣt <br>اكتب بالأمازيغية أو دع عنك الأمازيغية

Ari es Tmaziɣt niɣ ejj xaf-k Tamaziɣt
اكتب بالأمازيغية أو دع عنك الأمازيغية

Sekk ɣer yimeddukal أرسل للأصدقاء Send to friends

Ari es Tmaziɣt niɣ ejj xaf-k Tamaziɣt 

Mubarik Belqasem

Zi takunin en wannaz Amaziɣ nettaf is di 2019 sul tettṛakkʷal tufut en Yimaziɣen yeɣṛin di tesdawit zi tira es tutlayt Tamaziɣt deg yibatuten en tudert ed wamun waxxa ttexsen ad arin es tutlayin nniḍen. Aha waxxa malla yura yites dey-sen kra es Tmaziɣt yettili uyenni d-amareg ay wer yeqqaṛ yijjen aha wer et igerra yijjen aha ansa nnes yella di tmujay en temkaṛḍiwin yettwattun.

Wenni yesfukulen is (belli) netta yettawey itt di tutlayt Tamaziɣt aha “iɣennes” deg webrid en Tmaziɣt iwa ad yari icten niɣ snat en twalatin deg wayyur kra en tseddarin yefsusen es tutlayt Tamaziɣt (es tentala tawassant nnes, es umedya) ɣef mayenma en ubatu ay d-as igerzen zeg yibatuten en tudert tawassant ed tmukras tiɣerfanin ed tumanin timaḍlanin.

Deg useggʷas en 2019 wer yeqqim unamek deg uɣimi en “Yimeɣnasen en Tmaziɣt” ẓommen es unnegmer ɣef tira es tutlayt Tamaziɣt. Tasiweɣt en uzagul en waṛcaḍ tewḍa minzi (acku) agdil ed wansiwen iliketṛonanen ibennanen d-nitni yellan d-“aṛcaḍ amaynu” abennan. Aha tasiweɣt en uzagul en uselmeɣ tendel minzi anasiw (keyboard) ed yihallen en tira am Microsoft Word tticcen ac “aselmeɣ iliketṛonan” abennan wer yettmendun aha yeggʷran es wakk iklan ed twilawin ed yinectan. Aha tasiweɣt en tizzezwelt tewḍa minzi amessiḍen (computer) ed wansiwen zzizwilen ac akk ayen yellan es ubennan ɣef wegdil. Aha tasiweɣt en beṭṭo ed osiweḍ tewḍa minzi tagracca (the internet) d-nettat yellan d-abeṭṭay aha d-amessiweḍ abennan ameqqṛan akk. Wer teqqim tella ca en tsennsert yettwadgan i oẓommi ɣef tira es Tmaziɣt deg useggʷas en 2019.

Wer zey-k yettetter yijjen ad tili tira nnek d-tinniɣt taseklant Tamaziɣt. Maca tira es tentala Tamaziɣt tadigant tunhilt tewda. Aha wer yelli d-amalad malla (iɣ / mec) yella wezyen en yiwalen deg umagrad Amaziɣ nnec ila inetti Aserɣin (Aɛrab) niɣ Adarij niɣ Afṛansis niɣ Aseppanyu niɣ Angliz. Skud tella tiskiwt en twinest d-Tamaziɣt nettat d-tawinest Tamaziɣt. Aha aked wakud, iwdan (midden) ad lemden iwalen Imaziɣen inettiyanen yettwajebren deg yimawalen iqburen.

Aha wenni yettarin es Tmaziɣt Tarifant netta yettari es tutlayt Tamaziɣt. Wenni yettarin es Tmaziɣt en Dren (Aṭlas) netta yettari es tutlayt Tamaziɣt. Wenni yettarin es Tmaziɣt Tacelḥit netta yettari es tutlayt Tamaziɣt. Aha wenni yettsuran di tira nnes jar tentaliwin Timaziɣin netta altu yettari es tutlayt Tamaziɣt.

Aha wer yelli mayemmi ɣa tennuɣejfed ɣef wallfus ad yili umagrad nnec niɣ tirawt nnec d-amerrunkes en tgerrawt tiniri en yiɣṛem nnek niɣ en temnaḍt nnek es umentil en timmezrayin tintalanin jar temnaḍin yessawalen Tamaziɣt. Aya d-tanuflayt aha d-tisirikt. Malla (iɣ / mec) ɣṛan 40 en midden deg yiɣṛem nnek amagrad Amaziɣ nnek (ɣef yimxumbal en yiɣṛem, es umedya) amagrad nnec d-amaras. Wer yelli d-anakmar ad ɣṛen amagrad nnec 40.000.000 en Yimurakucanen ɣef tesna en wemtiweg.

Wenni yexsen ad yari Tamaziɣt es usekkil Alatin d-ta d-taragit tamyuft akk di temsutal a Timurakucanin aha timaḍlanin. Wenni yexsen ad yari es usekkil en Tifinaɣ wa d-inezgi nnes, aha wer d-as yeqqim ɣas ad dd-yessufeɣ iɣallen nnes. Aha wenna iran ad yaru Tamaziɣt es usekkil Aserɣin (Aɛrab) iwa wad iga kra yifen urd kra.

Aha inni yesfukulen is mezzɣen Tamaziɣt uca ttneṛwalen zi tira en kra en tseddarin Timaziɣin es tsennsert is ttṛajan (ssuggumen / tteqqlen) ad dd-ḍaren wumlan zi IRCAM niɣ zeg Uwanak iwa nitni wer fellsen di tutlayt Tamaziɣt, niɣ tili urin zey-s amen tet ssawalen di tudert nsen tawassant aha tanemyart, asel ma ad ṛajan (ad ssuggmen / ad qqlen) ad dd-ḍaren wumlan en IRCAM niɣ en Uwanak.

Awal aneggaru i wakk imennan, imaruten, imsaggagen, “imeɣnasen” ed yinaẓomen ɣef tira es tutlayt tayemmat nsen Tamaziɣt: Wenni wer yattarin es tutlayt Tamaziɣt ad xaf-s yejj Tamaziɣt aha ad yerzu i yixef nnes ɣef cra en tramsut (hobby) nniḍen ay izerrek aha ay yettellal es wawal ed tigawt.

Sekk ɣer yimeddukal أرسل للأصدقاء Send to friends

COMMENTS